اذا انت من الاشخاص اللي تتمرن ف دايما راح تسمع عن المكملات وكيف انها مهمة جدا وراح تختصر عليك الوقت وتوصلك لجسم احلامك وبدونها ماراح يكون فيه اي تغيير . ولكن هل الكلام ذا صحيح؟ اليوم راح نعرف ايش حقيقة المكملات وراح اعطيك اكثر ٥ مكملات شائعة وما تستفاد منها ف خلينا نبدأ
المكملات من اسمها فهي شي تكميلي مو اساسي بمعنى انك تقدر توصل لهدفك بدونها، لكن هي تساعدك انك تغطي النقص اللي يصير عندك في العناصر الغذائية زي البروتين والكارب او حتى الفيتامينات والمعادن اللي يكون صعب عليك تحصلها من الاكل. لكن دايما راح تسمع من شركات المكملات في السوشيال ميديا او حتى من المحترفين ان حرفيا كل المكملات مهمة لك واذا ما طلبت كل مكملاتهم راح تفوت على نفسك فرصة كبيرة وماراح توصل لهدفك الشي اللي يخليك تطلب مكملات ما تفيدك وتخسر فلوسك.
وعشان لا اطول عليك خلينا نبدأ بأول مكمل ماراح يفيدك وهو ال BCAA
ادري انك الحين مو مستوعب لكن خليني اشرح لك. ال BACC هو اختصار ل Branch Chain Amino Acids، وهو عبارة عن 3 أحماض أمينية أساسية وهي: اللوسين، الايزو لوسين، والفالين. وهنا دايما تسمع ان ال BCAA مهم جدا لانه يحتوى على الأحماض الامينية ال ٣ الاهم للبناء العضلي لعملية تخليق البروتين او اللي نسميها بالـ muscle protein synthesis وهي عملية اللي يتم فيها بناء الخلايا العضلية و للاستشفاء بالتالي الحفاظ على الكتلة العضلية خصوصا فترة التنشيف، بالتالي عزلوا ال ٣ احماض هذي وخلوها بمكمل مخصص لها وهو ال BCAA، وتم تسويقه على انك اذا تبغى تسرع من عملية البناء العضلي ضروري تستعمل ال BCAA.
ممتاز لكن قبل لا نوضح ليش ال BCAA مو مهم خلينا نوضح ان الاحماض الامينية نقدر نقسمها على قسمين اساسية، احماض امينية غير اساسية وهي الاحماض اللي جسمك يقدر يصنعها بنفسه واحماض امينية اساسية وهي أحماض الجسم ما يقدر يصنعها بنفسه ويحتاج ياخذها من مصدر خارجي سواء من الأكل أو المكملات.
| الاحماض الامينية الاساسية | الأحماض الأمينية الغير أساسية |
| ليوسين Leucine | ألانين alanine |
| ايزوليوسين Isoleucine | الأرجينين arginine |
| فالين Valine | الأسباراجين asparagine |
| هيستيدين Histidine | حمض الأسبارتيك aspartic acid |
| تریپتوفان Tryptophan | السيستين cysteine |
| ليسين Lysine | حمض الجلوتاميك glutamic acid |
| ثريونين Threonine | الجلوتامين glutamine |
| ميثيونين Methionine | الجليسين glycine |
| فينيل ألانين Phenylalanine | البرولين proline |
| سيرين serine | |
| التيروزين tyrosine |
وعشان نحصل الأحماض الأمينية الأساسية من الاكل ف يحتاج نعتمد بشكل أكبر على مصادر البروتين الحيوانية لانها تحتوي على الأحماض الأمينية الاساسية بشكل كامل بعكس المصادر النباتية اللي يكون فيها نقص في حمض او أكثر من الاحماض الامينية الاساسية
واذا ما تعرف ايش هو البروتين النباتي والبروتين الحيواني ف هنا يحتاج نرجع خطوة للخلف ونوضح ان
| النوع | البروتين الحيواني | البروتين النباتي |
| بعض الاصناف | اللحم الدجاج الأسماك البيض منتجات الألبان |
الفول العدس الحمص الرز الترمس |
اما في حالة انك ما قدرت تغطي نسبة البروتين عندك من الاكل هنا راح نعتمد على المكملات عشان نقدر نغطي احتياجنا من البروتين خصوصا من الاحماض الامينية وهنا يجي دور مكمل البروتين واللي يكون فيه كامل الاحماض الامينية الاساسية واللي من ضمنها ال BCAA.
عشان كذا وبكل بساطة نقدر نقول انك اذا تغطي احتياجك من البروتين سواء من الأكل خصوصا من مصادر البروتين الحيوانية مثل الدجاج او البيض ..الخ او حتى من مكمل البروتين ف انت قاعد تغطي احتياجك من ال BCAA من الأساس فما تحتاج تأخذه كمكمل زيادة لانه ماراح يفيدك. طيب ممتاز هل اذا استخدمت ال BCAA وما اهتميت اني اغطي كامل البروتين راح يفيدني؟
للأسف يا أسطورتي الدراسات أثبتت انه علشان تحصل عملية التخليق العضلي البروتين الجسم يحتاج الأحماض الأمينية ال9 مو فقط ثلاثة. ف بالتالي اعتمادك فقط على ال BCAA لحاله ماراح يفيدك بالشكل المطلوب وهنا فيه A Systematic Review ب2022 وكانت على 12 دراسة والهدف منها يعرفوا فايدة ال BCAA في زيادة القوة وزيادة الحجم العضلي وطلعوا بمخلص ان ال BCAA ماله اي تأثير على البناء العضلي او زيادة القوة.
وفيه دراسة ثانيه كانت تقارن بين الاحماض الامينية الاساسية ال EAA (اللي ضمنها الBCAA) مع الواي بروتين وكانوا يشوفوا تأثيرهم على البناء العضلي، تمت الدراسة على ١٥ شخص منهم اشخاص استخدموا الواي بروتين و أشخاص استخدموا ال EAA. ووجدوا في سياق البناء العضلي الافضل انك تاخذ الواي بروتين
بالتالي نقدر نقول انك اذا توصل لاحتياجك من البروتين واللي يكون مابين ١٫٦ ل ٢٫٢ جم بروتين / كجم من وزن جسمك (زي ما وضحت اغلب الدراسات) سواء من الاكل او من مكمل البروتين ف ماراح تحتاج مكمل ال BCAA
اما ثاني مكمل اشوفك قاعد تضيع عليه فلوسك هي حوارق الدهون او كيف ما احب اقول عليها حوارق الفلوس
حوارق الدهون هي أي منتج يساعد على زيادة معدلات الحرق (كيف ما يسوقون لها) اما عن طريق اختزال الدهون (اي تكسير الخلايا الدهنية) أو نقل الدهون من الخلايا الدهنية الى مصادر الطاقة او حتى حرق الخلايا الدهنية بشكل مباشر
بشكل عام الدهون تكون مخزنة في الجسم على هيئة خلايا دهنية تحت الجلد وداخل العضلات وكل مكان في الجسم، وظيفة حوارق الدهون انها تروح للخلايا الدهنية ويفكك الدهون هذي ويستخدمها كمصدر للطاقة. هذي مقدمة مهمة جدا وابغاك تركز معي. الحين حوارق الدهون نقدر نقسمها لقسمين اساسية
القسم الأول هي حوارق الدهون التجارية اللي تقدر تطلبها من اي متجر للمكملات وتكون متاحة بشكل قانوني. اما القسم الثاني وهي اللي تكون موجودة في عالم الظلام (عند الاشخاص اللي يبيعون الهرمونات..الخ) وما تكون بشكل قانوني وتكون محظورة. ف هنا كلامي راح يكون عن القسم الأول وهي حوارق الدهون اللي موجودة في كل مكان لان النوع المحظور ابدا ما انصحك تستخدمه لان يكون له أعراض جانبية خطيرة.
حوارق الدهون هذي تكون عبارة عن تركيبة معينة من اكثر من مادة تساعد على زيادة حرق الدهون زي الكافيين – ال كارنيتين وغيرها ولان المواد هذي بروحها ما تحرق دهون بشكل كبير ف حسب تفكير الشركات انهم يسوون تركيبة من أكثر من مادة مثال ( كافيين – ال كارنتين – CLA والعديد من المواد) بحيث تزيد من معدلات الحرق بشكل اكبر وايضا يساعدك على تقليل الشهية، وايضا بتلقى ان من مكونات حوارق الدهون أصناف تساعدك تخسر المويا اللي بجسمك بشكل كبير الشي اللي يعطيك رقم اقل على الميزان صحيح لكن مهو شي كويس للبناء العضلي لان العضلات ٧٠٪ منها مويا يا اسطوره.
طيب طالما هي ممكن تفيدنا في حرق بعض الدهون ليش ما استخدمها ؟
ببساطة ضروري تعرف شي مهم وهو ان حرق الدهون لا يساوي خسارة الدهون وهنا احتاج تركيزك شوي. اذا فيه شخصين واثنينهم جسمهم يستهلك ٢٠٠٠ سعره يوميا لكن الشخص الأول قاعد ياكل كميات عالية من الاكل تزيد عن ال ٢٠٠٠ سعره لكن في نفس الوقت ياخذ حوارق دهون، اما الشخص الثاني ما ياخذ حوارق دهون لكن بنفس الوقت يمشي على دايت متوازن ١٧٠٠ سعره تعتقد مين فيهم راح يخسر دهون؟ اكيد الشخص الثاني وذا لانه سوى عجز في السعرات الحرارية بعكس الشخص الأول صحيح انه مع حوارق الدهون ممكن يزيد شي بسيط يوصل حرق الجسم ل ٢١٠٠ بدل ٢٠٠٠ سعره بسبب حوارق الدهون لكن ماراح يخسر دهون طالما ياكل اعلى من السعرات اللي جسمه يحتاجها.
طيب هل ذا معناه اني انصحك تمشي على دايت وعلى حوارق دهون بنفس الوقت بحيث تزيد من سرعة النزول؟ ايضا ما افضل ابدا لان زي ما قلنا من مكونات حوارق الدهون أصناف تجبر جسمك يخسر مويا واللي يحتاجها الجسم بشكل كبير ف خسارة السوائل هذي لها تأثير سلبي على نشاطك وعلى تمرينك وعلى البناء العضلي بالتالي على المدى البعيد لها اضرار مو فوايد. ف اذا تبغى تزيد شوي من حرق الدهون عندك تقدر تستعمل كافيين لحاله سواء من القهوه او حبوب الكافيين واللي راح تخليك تاخذ مميزات الكافيين بدون لا تخسر فلوس كثير واذا بالعادة ما تاخذ كافيين انصحك تبدأ بأقل جرعة مابين ٥٠ ل ١٠٠ ملجم وتزيد بالتدريج اذا احتجت لكن ما افضل انك تزيد عن ٣٠٠ ملجم لان الحد الاقصى حسب التوصيات هو ٤٠٠ ملجم تقريبا لكن مهم تراعي الجرعة لان زيادة الكافيين المبالغ فيها تزيد عندك من التوتر، والقلق، وبالاضافة انها تأثر على نومك بالسلب.
على حسب Systematic review and meta-analysis ب2021 كانت مبنية على 21 دراسة عن حوارق الدهون الدراسة كانت تبغى تعرف إذا المكملات هذي فعلاً تنفع على المدى الطويل في نزول الوزن وكانت النتيجة إنه فيه شوي فائدة من المكملات (يعني التأثير مو صفر تماماً)، بس المشكلة إن النتائج ما كانت قوية كفاية، لأن نطاق الثقة شمل “صفر”، وهذا يعني إن ممكن ما يكون فيه فائدة أصلاً. ولما قارنوها بالنتائج اللي تجي من الدايت والرياضة لحالها، لقوا إن المكملات ما كانت أفضل، بل العكس، كثير من الأحيان النظام الغذائي والرياضة كانوا يعطون نتائج أقوى.
Comparing effectiveness of fat burners and thermogenic supplements to diet and exercise for weight loss and cardiometabolic health: Systematic review and meta-analysis
حتى ال (L- Carnitine) ماراح يساعدك على حرق الدهون او شي وخلينا نتكلم شوي عنه. ال L-carnitine هو حمض أميني غير أساسي يعني جسمك قادر على تصنيعه، وتقدر تاخذه من الاكل وتلقاه خصوصًا ف اللحوم ومشتقات الألبان مثل الحليب. ال ال- كارنتين موجود أغلبه في العضلات والقلب ودوره يساعد في نقل الخلايا الدهنية داخل الميتوكوندريا علشان يتم حرقها وإستخدامها كمصدر طاقة، فعشان كذا قرروا يضيفونه في منتجات حوارق الدهون، لكن للأسف أغلب الدراسات ما شافت أي فائدة لمكمل الال- كارنتين في زيادة حرق الدهون أو تحسين الأداء الرياضي.
ال- كارنتين موجود على 3 صيغ وهي: Tartrate, Acetyl, Propionyl. على حسب systematic review and meta-analysis في 2020 على 37 تجربة سريرية عشوائية، النتيجة كانت خسارة بسيطة في الوزن على الميزان وشافوا انه نسبة الدهون ومنطقة الخصر قلت بشكل بسيط.
Effects of l-carnitine supplementation on weight loss and body composition: A systematic review and meta-analysis of 37 randomized controlled clinical trials with dose-response analysis
على حسب دراسة في 2000 كانت على 36 امرأة تعاني من السمنة وقسموهم لمجموعتين:
المجموعة الأولى: أخذت 4 جرام كارنتين يوميًا
المجموعة الثانية: اخذت حبة وهمية
كانت الدراسة لمدة 8 أسابيع، وكانت النساء تمشي 30 دقيقة يوميًا 4 مرات في الأسبوع، والنتيجة ما شافت زيادة في حرق الدهون عند المجموعة اللي أخذت الكارنتين.
اما الدراسات اللي شافت فوائد ال ال كارنتين كانت ف الغالب سريرية أو على فئران أو كان يتم أخذ الكارنتين ك حقن مو ك مكمل. فالخلاصة تقدر توفر فلوسك واذا هدفك خسارة الدهون كل اللي تحتاجه انك تسوي عجز في السعرات الحرارية فقط.
عشان أختصر عليك برأيي تبدل حوارق الدهون بأشياء طبيعية، يعني إذا تبغى كافيين فتقدر تبدلها بالقهوة، أو الشاي، أو البري وورك اوت بحيث تتحصل على نفس الفائدة من ناحية طاقة أفضل، زيادة معدلات الحرق وفي نفس الوقت تقلل من شهيتك!
Caffeine, coffee, and appetite control: a review
اما ثالث مكمل انا نفسي كنت استخدمه هو الجلوتامين!
ادري انك منصدم لكن خلينا نعرف اولًا ايش هو الجلوتامين؟ الجلوتامين هو عبارة عن حمض أميني غير أساسي (تتذكر الجدول حق الأحماض الامينية؟) يعني الجسم يقدر ينتجه من نفسه وهو اكثر حمض اميني موجود في الجسم. والجلوتامين له عدة فوايد منها تحسين الجهاز المناعي، تعزيز من صحة الأمعاء وهذا رح يحسن من عملية الهضم..الخ. طيب أنا ليش ذكرت انه مو مفيد؟ السبب جدًا بسيط أولًا أنه جسمك يصنعه بشكل كافي، وبالإضافة إنك تقدر تحصل عليه من مصادر البروتين سواء النباتية او الحيوانية بكل سهولة.
طيب هل الجلوتامين يساعدنا على الاستشفاء بالتالي على البناء العضلي زي ما هو منتشر وشائع في السوشيال ميديا ؟
على حسب دراسة تمت في 2001 كانوا يشوفوا تأثير الجلوتامين على الي يتمرنون في النادي من ناحية البناء العضلي، الدراسة كانت على 31 شخص قسموهم لمجموعتين:
المجموعة الأولى: أخذت جلوتامين
المجموعة الثانية: أخذت حباية وهمية.
المجموعتين حصلوا على نفس النتائج من ناحية البناء العضلي.
Effect of glutamine supplementation combined with resistance training in young adults
على حسب مراجعة ثانية في سنة 2019 على 55 دراسة كانت تشوف تأثير الجلوتامين على تحسين الاستشفاء بالتالي الاداء الرياضي. واغلب الدراسات وجدت انه ممكن يساعدك على تقليل التعب لكن ماله دور اساسي في تحسين الاستشفاء بشكل كبير بالتالي ماله دور في تحسين الاداء الرياضي
Glutamine as an Anti-Fatigue Amino Acid in Sports Nutrition
طيب هل ذا معناه ان الجلوتامين ماله اي فايدة؟ زي ما تتذكر قلنا ان الجلوتامين له فوايد كثيرة ففي دراسة
في ٢٠٢١ كانت تشوف دور الجلوتامين في تحسين صحة الأمعاء ودوره من ناحية تحسين الحالة النفسية وفي الدراسة شافوا انه الجلوتامين يفيد في تعزيز صحة الأمعاء وتحسين عملية الهضم.ممكن يساعد على تحسين صحة الأمعاء، وبالتالي يكون له تأثير غير مباشر على تحسين المزاج.يعني: “لو صلحنا البطن، المخ ينبسط”
The role of glutamine in supporting gut health and neuropsychiatric factors
لكن صحيح الجلوتامين يفيد صحة الأمعاء و تحسين الهضم، لكن زي ما ذكرنا ان الجسم يصنعه وتقدر تحصل عليه من الأكل فما تحتاج تشتريه كمكمل. يعني عشان أقربلك الصورة تخيل انه معك كاسة موية مليانة، إذا ضفت لها كمان موية هل رح تستفيد؟ أكيد لا! وبالضبط نفس الشي نسبةً للجلوتامين لما عندك كمية كافية منه فليش تحتاج تزيد؟
لكن ضروري نعرف شي مهم جدا وهو احيانا الجسم ما يقدر يصنع كفايته من الجلوتامين خصوصا في بعض الحالات مثل المرض الشديد، الحروق، مرضى السرطان ومرضى الايدز، والأشخاص الي سوو عملية جراحية. ذي الحالات تحتاج تحصل على الجلوتامين من الطعام او من مكمل.
اما المكمل الرابع والاخير واللي ادري كثير منكم بيتهاوش معي هي محفزات التستوستيرون: أو ال Testosterone Boosters.
أول شي خلينا نعرف ايش هو التستوستيرون؟ التستوستيرون هو الهرمون الجنسي الرئيسي عند (موجود عند الإناث لكن موجود عند الرجال بنسبة أكبر بكثير بالمقارنة بالإناث) وهو المسئول عن صفات الذكورة مثل:
غزارة الشعر – خشونة الصوت – الكتلة العضلية ..الخ
التستوستيرون هرمون مهم جدا لاكثر من سبب اهمها
– يساعد بنمو الأنسجة التناسلية الذكرية مثل الخصيتان
– تحسين المزاج
– زيادة النشاط
– تحسين كثافة العظام
– هرمون الذكورة هو المسؤول الأول عن بناء الكتلة العضلية، ف كل ما زاد هرمون الذكورة كل ما زادت الكتلة العضلية حتى بدون ما تمارس أي نشاط رياضي! ففي دراسة تمت على ٤٣ شخص ما يمارسون أي نشاط رياضي قسموهم على ٤ مجموعات.
المجموعة الأولي: اعطوهم مادة وهمية بدون تمارين مقاومة
المجموعة الثانية: اعطوهم هرمون الذكورة بدون تمارين مقاومة بمعدل ٦٠٠ ملجم تستوستيرون
المجموعة الثالثة: اعطوهم مادة وهمية مع تمارين مقاومة.
المجموعة الرابعة والأخيرة: اعطوهم هرمون الذكورة مع تمارين مقاومة بمعدل ٦٠٠ ملجم تستوستيرون
التمرين كان ٣ ايام بالاسبوع والدراسة كانت لمدة ١٠ أسابيع وكانت النتيجة :
المجموعة الأولى :مافي زيادة في الكتلة العضلية
المجموعة الثانية :زادت الكتلة العضلية ٣ كيلو تقريبا!
المجموعة الثالثة : زادت الكتلة العضلية ٢ كيلو.
المجموعة الرابعة : زادت الكتلة العضلية بمعدل ٦ كيلو.
The effects of supraphysiologic doses of testosterone on muscle size and strength in normal men
ممتاز وبسبب كل المميزات هذي دايما نحاول نزيد من مستويات التستوستيرون وهنا يجي دور شركات المكملات واللي طلعوا بمنتجات محفزات التستوستيرون وبكل بساطة يقولون إنها تساعدك ترفع من هرمون التستوستيرون بشكل طبيعي لكن هل الكلام ذا صحيح؟
خلينا نشوف من ايش تتكون هذي المحفزات ، من أهم هذي المواد: عشبة الحسك (Tribulus terrestris) واللي ما ترفع التستوستيرون لكن فقط تزيد من الرغبة الجنسية، وما في دليل على أنها ترفع التستوستيرون، والحلبة (Fenugreek) أيضًا تزيد الرغبة الجنسية، ولكن ذا مو معناه انه التستوستيرون رح يزيد، لأنه ما في علاقة مباشرة بين زيادة الرغبة الجنسية وزيادة مستويات التستوستيرون. ومن المواد الثانية اللي ممكن تلاقيها مثل الزنك والمغنيسيوم واللي يكون لها دور في تحسين مستويات هرمون الذكورة في حالة انها كانت ناقصة في جسمك عن الحد الطبيعي. بالتالي زي ما شفت محفزات التستوستيرون ماراح تزيد عندك من مستويات الهرمون اذا كان في الحد الطبيعي واللي مابين 300-1000 نانوغرام لكل ديسيلتر من التستوستيرون. حتى اذا عندك نقص عن الحد الطبيعي ف ما تحتاجها لانك تقدر بخطوات بسيطة تزيد من مستويات التستوستيرون بدون ما تدفع المبالغ الكبيرة على المحفزات هذي. واذا جيت اختصر عليك الخطوات اللي راح تساعدك تحصل اعلى مستويات من التستوستيرون بشكل طبيعي ف
– أول خطوة معنا وهي تقليل نسبة الدهون
فيه علاقة قوية بين نسبة التستوستيرون ونسبة الدهون بالجسم ف كل ما زادت نسبة الدهون عن الحد الطبيعي كل ماقل هرمون التستوستيرون وزاد هرمون الاستروجين وهو هرمون الانثوي.
وذا لان مع زيادة الخلايا الدهنية بيزيد تفعيل هرمون الاروماتيز والهرمون ذا راح يحول هرمون التستوستيرون للهرمون الانثوي “الاستروجين” واللي ممكن يسبب لك جاينو او تثدي عشان كذا لما تقلل من نسبة الدهون وتوصل لنسب معتدلة بيقل تفعيل هرمون الاروماتيز بالتالي بتلقي ان هرمون التستوستيرون بدا يزيد
اما نسبة الدهون الموصى بها فهي بين ١٢ ل ١٨ ٪
Body fatness and sex steroid hormone concentrations in US men: results from NHANES III
– ثاني خطوه عشان تقدر تقلل من نسبة دهون الجسم و تزيد من هرمون الذكورة فأنت تحتاج تعدل تغذيتك وتسوي عجز في السعرات الحرارية وتتاكد ان نظامك متكامل غني بالبروتين وفيه نسب معتدلة من الكربوهيدرات والدهون.
اللي بيصير لما تمشي على نظام متوازن وفي نفس الوقت تمشي على عجز بسيط في السعرات الحرارية ذا راح يضمن ان نسبة الدهون عندك راح تقل بسبب عجز السعرات وكيف ما وضحنا ان فيه علاقة بين نسبة الدهون ونسبة التستوستيرون بالتالي راح تضمن ان تغذيتك تكون شاملة لمعظم الفيتامينات والمعادن حتى إذا تكمل النقص من خلال بعض الفيتامينات مثل فيتامين د والزنك واللي لهم دور كبير ومهم في الحفاظ على هرمونات الجسم وزيادة هرمون التستوستيرون
– والخطوة الثالثة واللي جدا مهمة هي وجود تمارين المقاومه مثل الحديد أو غيرها من التمارين اللي يكون فيها ضغط كافي يجبر جسمك انه يبني كتلة عضلية واللي لها دور أساسي في تحسين مستويات التستوستيرون
– والخطوة الرابعة والاخيرة واللي راح تزيد من هرمون الذكورة للضعف هي تحسين جودة النوم
فيه أكثر من دراسة ربطت ان فيه علاقه ايجابيه بين عدد ساعات وزيادة هرمون الذكورة ومنهم دراسة كانت تقيس العلاقة بين عدد ساعات النوم و نسبة التستوستيرون في الصباح تمت على ٢٠ شخص بعمر بين ٦٤ ل ٧٤ عام وكانت النتيجة أن الأشخاص اللي ينامون ٨ ساعات في الليل بشكل منتظم عندهم نسبة التستوستيرون ضعف الأشخاص اللي ينامون ٤ ساعات فقط في الليل.
Association between sleep and morning testosterone levels in older men
ف الخلاصة هنا زي ما تشوف أنه حتى لو عندك نقص في مستوى التستوستيرون الأفضل إنك تروح لأساس المشكلة وتحلها مو تستعمل محفزات التستوستيرون الي تفيدك بشكل بسيط.
الحين خلينا نشوف رأي الدراسات على محفزات التستوستيرون: دراسة ب2019 هدفها تفحص أقوى 5 محفزات تستوستيرون على أمازون وكان تقييم أغلب المحفزات ذي 4.5 من 5 نجوم في الدراسة راجعو 191 دراسة الي فيها ال10 مكونات الموجودة ف أغلب محفزات التستوستيرون. النتيجة شافوا انه الدراسات البشرية القليلة على محفزات التستوستيرون ما شافت تغيير أو فائدة لذي المحفزات. وقالوا في المراجعة أنه كثير من الدراسات الموجودة كانت على حيوانات، أو دراسات مخبرية وذي الدراسات ما تعطينا إجابة مؤكدة أنه محفزات التستوستيرون تقدر تفيدنا.
Testosterone Imposters: An Analysis of Popular Online Testosterone Boosting Supplements
دراسة ثانية ب 2020 قيمة الادعاءات الي تقولها شركات محفزات التستوستيرون وأن ذي المحفزات تساعد بزيادة التستوستيرون. قيموا بهذي الدراسة 50 مكمل من محفزات التستوستيرون وراجعوها عشان يقيموا هل الجرعة المكتوبة صحيحة ولا لا. اكتشفوا في الدراسة انه 24.8% منها فقط تساعد تعزز التستوستيرون بشكل بسيط، و61.5% مالها أي تأثير، و10.1% منها شافوا نزول في التستوستيرون!
‘Testosterone Boosting’ Supplements Composition and Claims Are not
Supported by the Academic Literature
ببساطة ولاني طولت عليك انت ما تحتاج محفزات التستوستيرون، ولو عندك نقص فالأفضل أنك تركز في الأساسيات مثل النوم الكافي، والرياضة، وتمشي على دايت وفر فلوسك يا أسطورتي!
في النهاية نقدر نقول ان اكثر ٤ مكملات شائعة ما تحتاجهم
– BCAA
– حوارق الدهون
– الجلوتامين
– محفزات التستوستيرون
الحين بعد ما عرفت هذي المكملات أتمنى انك توفر فلوسك وتتجنبها، شاركني يا أسطوري هل قد استعملت ذي المكملات من قبل، وهل في مكملات ثانية تحب اتكلم عنها؟
شكرا لك لوقتك واهتمامك، وشارك الموضوع مع شخص يستفيد منه.