في بدايتي في النادي خصوصا اول يوم تمرين ومن الحماس اللي كان فيني سويت اخطاء كثير والأخطاء هذي كلفتني وقت ومال ولو كان فيه شخص وقتها يوجهني كنت بوفر على نفسي مجهود كبير ف اذا رجع فيني الزمن لاول يوم في النادي هذي ٥ اشياء مستحيل اسويها
اول حاجه ما هضيع فلوسي على المكملات. هوس المكملات بدأ معي قبل النادي من الأساس كشخص كنت اعاني من النحافة كنت دايما اسمع ان المكملات هي السحر اللي راح تحولني من الى شخص معضل ودايما اسمع من المحيط اللي حولي ان اي شخص يتمرن لازم ياخذ المكملات عشان يكون معضل وان المكلات هي اللي راح تعطيني نتيجة جبارة وما اخفي عليك الشي ذا خلاني ادفع مبالغ كبيرة. ولكن للاسف لما بديت استخدم المكملات ما شفت النتايج اللي كنت توقعها وبديت الوم نفسي ان اكيف فيه شي غلط او حتى ان الخطأ فيني انا. ولكن اللي فهمته بعد سنوات في النادي وتدريب مئات الأشخاص أونلاين ان الموضوع مو متعلق بالمكملات ابدا. الأساس هو تغذيتك والمكملات من اسمها تكمل الشي الناقص عندك وعشان تعرف ايش ناقص ف انت تحتاج وقت تمشي على الدايت وهنا فقط راح تعرف ايش بالزبط تحتاج هل تحتاج لبروتين لانك مو قادر تقفل احتياجك من البروتين. او تحتاج مكمل للكارب؟ او ماتحتاج من الأساس! عشان كذا اذا نويت تبدأ في رحلتك في النادي ابدا لا تفكر في المكملات اول اسبوعين لشهر.
اما الحاجة الثانية واللي كانت مضيعتني أول هو أني كنت انوع بالجداول كل اسبوعين. وكان السبب بالنسبة لي منطقي وقتها كان منتشر انك عشان تبني عضلات ف انت محتاج تفاجئ العضلات بتمارين جديدة بحيث ما تتعود على نفس الروتين لانك اذا سويت نفس التمارين اوزانك بتثبت بالتالي ماراح تبني عضلات! الشي ذا حرفيا اذا ضيع عليا وقت كبير وكنت كل ما أشوف جدول جديد خوي يقول لي عليه أغير الجدول اللي أنا ماشي عليه مباشرة. وعشان تعرف كيف العضلات تبنى ف خليني اقولك العامل الاساسي اللي راح يجبر جسمك انه يبني كتلة عضلية أن يكون فيه ضغط على العضلة أو توتر ميكانيكي علي العضلة وكل ما زاد الضغط كل ما جسمك راح يبني كتلة عضلية أكبر عشان يقدر يقاوم ويتأقلم على الضغط.
ذا فعلى سبيل المثال لما تكون في اول يوم بالنادي و تسوي تمرين بنش برس بالبار هنا بيكون فيه ضغط جديد على عضلة الصدر هنا جسمك عشان يبدا يتأقلم على الضغط هذا راح يبني عضلات ولكن مع الوقت بتتعود علي البنش برس لكن الحل مو انك تغيره زي ما كنت اسوي الحل انك تزيد الوزن او تزيد التكرارت بمعنى انك تزيد الحمل (تسوي زيادة تدريجية) ف بدل ما كنت تتمرن ب ١٠ كيلو تتمرن ب ١٢ كيلو و بدل ما كنت تسوي ١٠ عدات تصير ١٢ وهكذا
طيب ايش المشكله اذا بدلنا التمارين كل اسبوعين! اللي ما كنت اعرفه ان تغيير التمارين كل فترة ماراح يخلي العضلات تتأقلم على التمرين نفسه خصوصا وان جسمك يحتاج له مدة عشان يصير فيه تكيف عصبي عضلي وتعلم مهارة التمرين ف بتغييرك التمرين كل اسبوعين ماراح تعطي للعضلات وقت كافي انها تتاقلم وتتطور على التمرين لانك غيرته عشان كذا اللي كان لازم أسويه هو أني أخذ أي جدول حتى لو كان أسوأ جدول في العالم لو كنت التزمت عليه وزودت فيه بالأوزان حبة حبة الشيء هذا أفضل من أني أغير تماريني والجداول اللي أنا ماشي عليها كل شوي
الحاجة الثالثة كنت أحسب أنه النادي هو الأساس وكنت ساحب على تغذيتي تماما.
لاني كنت ابغى اكبر كتلة عضلية في بداية مشواري بالنادي بدأت اتابع اشخاص قطعوا الطريق قبلي بحيث اقدر استفيد من تجاربهم ودايما كنت اسمع عشان تبني عضلات تحتاج تتمرن تمارن كثيرة ف كنت اتمرن ٦ل٧ تمارين صدر ٢٥ مجموعه في الأسبوع وكان على بالي اني كل ما اطول في النادي راح احصل نتايج افضل بدون ما اركز على تغذيتي بالشكل المطلوب كنت فقط اكل اصناف صحية! الشي اللي كانت نتيجته ان الاستشفاء قليل لان ما كنت اكل سعرات كافية ولا كنت اغطي البروتين اللي يحتاجه جسمي لذلك أول سنتين تحصلت على نتائج بس مو أفضل شيء واللي ممكن أسويه هو أني أتعلم عن تغذيتي وأكلي من البداية ومو لازم أضغط نفسي بالموضوع هذا ولكن أبدأ ابني فهم لكميات الأكل اللي جسمي يحتاجها وكم احتاج بروتين كنت بختصر على نفسي وقت كبير
الحاجة الرابعة واللي تعبتني جدا هي أني كنت أقارن نفسي بالأشخاص اللي كنت اشوفهم بالنادي.
دايما كنت اطالع أشخاص معضلين في النادي وكنت اقارن تطوري مع تطورهم ودايما كنت احس باحباط والوم نفسي واقول ان جيناتي مو افضل شي بدون ما اعرف اي تفاصيل عنهم كم سنة لهم يتمرنون او كيف ظروفهم وكيف التزامهم خصوصا وان فيه أشخاص منهم لهم خمس سنوات ست سنوات ف كنت قاعد اقارن الصفحة الأولى حقتي بالصفحة المية حق شخص ثاني ف واللي كنت احتاج اسويه وقتها اني اركز فقط على نفسي وابدا اقارن نفسي الحين بنفسي قبل ٣ل٦ اشهر واشوف هل فيه تطور او لا
الحاجة الخامسة كنت أستحي من جسمي. الشي ذا خلاني ما اخذ صور وما اقيس وزني ف ما كنت اعرف هل مع الوقت قاعد اتطور او لا بالتالي كان فيه اخطاء تحتاج تعديلات ما كنت اعرفها من الأساس لأني ما كنت اطالع صور لجسمي فلذلك ما وثقت رحلتي شهر بشهر وسبوع بسبوع فلو بعيد من أول بتأكد أنه يكون عندي فيديوهات او صور كل اسبوع او اسبوعين أطالع فيها وأقارن نفسي بنفسي عشان أشوف مدى التقدم اللي أنا حققته على مدى الشهور.
ف إذا تفكر تروح بالنادي اختصر على نفسك سنوات
١- اطلب المكملات اللي تحتاجها فقط
٢- اثبت على جدولك أطول فترة وحاول تتطور بالاوزان والعدات
٣- اعرف كم جسمك يحتاج من الأكل ومن البروتين
٤- لا تقارن نفسك بغيرك
٥- وثق رحلتك عشان تقيم النتايج